أبرز الأسئله التي تدور في أذهان الجميع حول جورجيا

ناس كتير لما عرفت اني عايش فى جورجيا و مستثمر فى مجال هناك ، وأن جورجيا تأشيرتها سهلة جدا وبتطلع اونلاين في اقل من اسبوع ، بعتت تسألني عن الهجرة والعيشة فيها . 
انا عارف ان الظروف الاقتصادية في مصر أصبحت صعبة وللأسف اصبح حلم الكثيريين هو الهجرة منها ، علشان كدة كنت بستفسر عن مضوع الهجره ده من كل واحد بقابله من الحكومه هناك علشان اكون تصور عن الموضوع .
انا بقالي هنا اكتر من 6 سنوات وقابلت مصريين بيدرسوا وبيشتغلوا وبيستثمروا في جورجيا . ناس منهم ربنا وفقها وناس اكتر بكتير لم توفق ورجعت تاني .
وانا من خلال خبرتي في السفر في اوروبا، اول ما وقعت عيني على جورجيا حسيت على طول انها بلد نامية اقتصاديا . الاقتصاء الجورجي عاما اقتصاد ضعيف هش، معتمد على السياحة والزراعة بشكل اساسي . البلد صغيرة ومواردها الطبيعية والصناعية محدودة جدا. معدلات البطالة من 12-16٪.
هل ممكن تلاقي شغل هنا بمؤهلاتك ؟
للأسف الوضوع صعب شوية علشان عائق اللغة هيكون كبير. لازم تكون بتتكلم جورجي او روسي علشان تقدر تشتغل في شركات بمؤهلاتك العلمية. اي صاحب عمل هيفضل يشغل واحد يتحدث الجورجية او الروسية عن واحد لا يتحدثهم. الا بقى لو تخصصك تقني ونادر جدا ولا يحتاج الى تواصل مع عملاء او زملاء او موردين او اي شخص جورجي آخر.
طيب انا مش معايا لغة جورجية او روسية، وكمان تعليمي على قدي ومعنديش مهنة معينة ومستعد اشتغل اي حاجة، هلاقي؟
الوظائف الخدمية
اغلب الوظائف الي هتلاقيها ولا تحتاج الى لغة جورجية او روسية هتكون وظائف خدمية – في مطاعم كافيهات فنادق – في المطبخ او جرسون او الشيشة او نظافة – وسمعت كمان عن “فواعلية” في مشاريع عقارية – حاجات لا تحتاج مهارات لغوية او احتكاك مباشر مع الزباين .
لكن هل ممكن في اي مكان؟
للأسف لأ. اغلب الاحوال هيكون صاحب العمل اجنبي (غير جورجي) – هتلاقي مطعم – عراقي – مصري (عربي عاما) – تركي – ايراني. اغلب الاماكن هيكون عنده اولوية لابناء بلده . يعني العراقي هيشغل العراقي والايراني هيشغل الايراني . ان لم يجد، ممكن يشوف جنسيات تانية . ممكن الاماكن دي تشغلك من غير ورق في الاول، ولو مبسوط منك يعملك عقد عمل . الشغل ده كمان اغلبه هيكون موسمي . يعني بيشتغل اكتر من المواسم السياحية المزدحمة، خصوصا الصيف
في الحالة دي هل مفيش عائق لغة؟
مفيش عائق لغة جورجية او روسية، لكن هيكون في عائق لغة انجليزية لو اشتغلت في مطعم غير عربي. لازم تكون بتعرف تتكلم انجليزي علشان تعرف تتواصل مع الناس الي حواليك في الشغل اذا لم يكونوا عربا. اضعف الايمان يعني لازم تكون بتتكلم انجليزي علشان تتفاهم في الحاجات البسيطة مع التركي والايراني والجورجي .
مرشد سياحي للعرب
من الوظائف المنتشرة للمصريين هنا في مجال السياحة هي مرشد سياحي للسياح العرب او المصريين الي بيزوروا جورجيا كتير بقالهم كام سنة . افواج او عائلات او افراد بيحتاجوا مرشد سياحي يكون معاهم بيتكلم عربي علشان يسهل امورهم في التنقلات والمزارات. بتحتاج خبرة ومعارف في مجال السياحة.
ازاي تاخد اقامة قانونية؟
لو لقيت وظيفة مناسبة بمؤهلاتك او من غير مؤهلاتك، ينفع اعمل اقامة قانونية ؟
ينفع طبعا. لكن علشان تحصل على اقامة قانونية هتكون محتاج عقد عمل في خلال اول 30 يوم من وصولك الى جورجيا. ليه بقى؟ لو مسافر جورجيا بتأشيرة سياحة، لازم تقعد فيها 30 يوم فقط وتخرج منها بدون كسر التاشيرة. حتى لو معاك عقد عمل في اليوم ال31، مش هتعرف تعمل اقامة.
كسر التاشيرة
علشان تتفادى مشاكل كسر التاشيرة لو عدى 30 يوم من غير ما تلاقي شغل هو انك تخرج من جورجيا وترجع بتأشيرة جديدة. هل لازم ارجع مصر يعني؟ لا مش ضروري، ممكن تقدم على تاشيرة دولة اذربيجان المجاورة لجورجيا وتروحها بالاتوبيس اسبوع وترجع مثلا. ده اقتراح ناس بتعمله علشان تتفادى الرجوع الى مصر مرة تانية علشان توفق اوضاعها القانونية في البلد.
الحل التاني هو ان واحد جورجي او صاحب عمل يعملك عقد عمل وهمي، تروح تقدم بيه على اقامة وتاخدها، وبعد كدة صاحب العمل يلغي العقد (علشان التأمينات). لكن طبعا الي هيعملك الخدمة ممكن ياخد من 200 الى 500 دولار علشان يعمله الك .
المرتبات مجزية ؟
لو اشتغلت بمؤهلاتك، طبعا هتسألني هقبض كام ؟
طبعا معرفش لان دي حاجة بتختلف من مهنة للتانية ومن واحد للتاني . مسؤوليتك تدور اونلاين وتعرف قبل ما تاخد اي خطوة. بس الي أعرفه ان متوسط المرتبات ضعيف نسبيا .
الاجر اليومي للشغلانات الخدمية (من غير مؤهلات) بشكل غير قانوني في مطعم ولا كافية ولا فندق ممكن تكون في حدود ١٥ لاري في اليوم (10-12 ساعة)
ولما صاحب الشغل يعملك عقد قانوني، ممكن يكون في حدود ال20 ولو حظك حلو ممكن25 لاري في اليوم .
الوظيفة الاعلى اجرا هم “الفواعلية” في مشاريع البناء الخاصة بالخليجيين – محدودة نسبيا (ممكن يوصل 30 لاري في اليوم).
طيب بكام اللاري ده يعني؟
الدولار الامريكي بحوالي 2.40 لاري حاليا (يوليو 2017) – يعني الاجر اليومي هيكون في حدود .55دولار لو شغال غير قانوني وممكن يوصل ٧.٥ الى ١٠ دولار في احسن الاحوال لو اشتغلت قانوني. يعني لو افترضنا انك اشتغلت 6 ايام tn الاسبوع – 26 يوم في الشهر مثلا – هتعمل من 143 الى 260 دولار في الشهر
. هنصرف كام منهم بقى؟
تكاليف المعيشة
تكاليف الاقامة الشهرية تختلف من حد للتاني طبعا، ولكن ممكن نقسمهم لحاجتين، السكن ومصاريف المعيشة.
ايجار اوضة في شقة في تبليسي يبدأ من 100 الى 150 دولار في الشهر . ممكن تكون اقل من كدة في احد الاحياء البعيدة عن وسط تبليسي ولو كانت اوضة فيها 2 او 3 مع بعض، ساعتها ممكن تكون من 40 الى 50 دولار في الشهر .
مصاريف المعيشة (اكل، شرب، مواصلات، فواتير) ممكن تكون من 100 الى 150 دولار في الشهر.
لو افترضت انك عايش مع 3 في اوضة علشان توفر مصاريف الاقامة وعايش باقل المصاريف المعيشية، يبقى اجمالي نفقاتك الشهرية في حدود (50 + 100) = 150 دولار في الشهر. يعني احسن الظروف بالتقريب تعمل 250 وتصرف 150 يتبقى معاك 100 دولار مثل كل شهر.
اقدر اروح اوروبا الشنجن من جورجيا؟
مش عارف ليه في اعتقاد ان تاشيرة الشنجن حاجة معمولة للتضييق على المصريين فقط في مصر وانها هتكون اسهل من اي مكان تاني في الارض؟ تاشيرة الشنجن وورقها واجرائتها متشابهين في كل حتة. تقديمك عليها من جورجيا زي تقديمك عليها من مصر. محتاج جواب شغل وحساب بنكي كويسين علشان تقدر تاخدها. تقديمك من جورجيا لا يحسن من فرص حصولك الا اذا كان ورقك قوي وسليم.
الهروب الى اوروبا ممكن؟
للاسف في مصريين كتير وصلوا جورجيا من اجل فرص عمل وحياة افضل، ولكن تحطمت احلامهم كلها بسبب ضعف فرص العمل مقارنة بمصاريف المعيشة. وقع منهم كتير فريسة للنصابين الي بيستغلوهم ويضحكوا عليهم . اشهر طرق النصب هي “التهريب الى اوروبا” …. انابستغربت اوي ؟؟ ازاي طيب اذا كان مفيش حدود بين جورجيا ودول الشنجن؟؟ يقولك ايه بقى، هنهربك في مركب تصدير خضار من مدينة باتومي رايحة اوكرانيا عن طريق البحر الميت مقابل حوالي 300 دولار. طيب اوكرانيا دي مش شنجن اصلا يا جدعان وظروفها الاقتصادية زي جورجيا لو مش اوحش (اهلها بشتغلوا كل حاجة يعني). بعد ما توصل اوكرانيا بقى هتشق طريقك لحد حدودها الشمالية مع بولندا وتقابل ناس تانية تهربك ليها مقابل حوالي700 دولار. ناس كتير اتنصب عليهم في المواضيع دي ولا راحوا في اي حتة والي راح عليهم فلوسهم فقط . كمان طلع بعض النصابين الى بيوهمو البعض ان عندهم شركات هنا ويقدمو ليهم اوراق تثبت كده والاوراق دى ساهل حصولهم عليها قانونى من هنا تثبت ان عندهم شركات فعلا وبيوهمو الناس بعقود عمل بمرتبات تخلى الشباب الغلبان يسيل لعابه الناس دى بتوهم الشباب بعقودعمل فى جورجيا خلو بالكم كلكم من الموضوع ده و اى استفسار عن اى شىء فى جورجيا انا جاهز وحردعليكم بنفسى من خلل الوتس اب او الفيبر او مسنجر فيس بوك لذالك ارجو الحذر الشديد

فرص الشغل ضعيفة وبالعافية مش هتكفي المعيشة .
مرتبات الجورجيين في نفس الحدود دي، لكن المرتب بتاعهم بيكفيهم وزيادة اوي كمان علشان عايشيين في بيوتهم او مع اهاليهم وماعندهمش مصاريف سكن.
علشان كدة نصيحة يعني، لو هتسافر جورجيا تشتغل، حاول تزبط امورك من قبل ما تروح مع حد هناك. ياريت ما تكسرش فيزا وتحترم قوانين البلد. لان الموضوع لو ابتدى يزيد ممكن وزارة الخارجية الجورجية تصعب التاشيرة للمصريين كلهم وتخليه رخم زي دول الشنجن والباب يتقفل خالص.
ناس كتير من مصر بتبعت تستفسر من المصريين الي عايشيين في جورجيا وبيسمعوا نفس الكلام الي قولته ده، لكن طبعا بيكونوا شاكيين فيهم ومش مصدقيين. بيحسوا انهم بيطفشوهم علشان “ياكلوا في خيرها لوحدهم”. علشان كدة انا حبيت اكد الكلام ده بنفسى
البيزنس في جورجيا
طيب لو انا واحد معايا فلوس وعايز استثمر في جورجيا، هل في فرص مجزية؟
جورجيا من البلاد الي بتسهل كل حاجة للمستثمرين الاجانب وبتتميز بشفافية عالية جدا وجهاز مكافحة فساد من اقوى الاجهزة في المنطقة. يعني قانونيا وسياسيا البلد جاذبة للاستثمار. لكن اقتصاديا؟ ده طبعا شئ مقدرش افتي فيه. لازم تروح زيارة مرة واتنين وتلاتة وتعيش هناك علشان تفهم ايه الخدمات المتوفرة وايه الخدمات الي ناقصه، وتقابل ناس عندها بيزنس هناك وتشوف الدنيا ناقصها ايه وتكون انت بتفهم فيه. الي عرفته ان اجرائات فتح شركة بسيطة وسريعة وبرأس مال مش تعجيزي.
انا قابلت مصريين هناك عاملين مطاعم او كافيهات. قابلت مصريين تانيين اشتروا عربيات وجابوا عليها سواقين جورجيين وعملوها تاكسيات. ناس تانية اجرت هوستل من صاحبه واشترت سراير وبتأجره لحسابها. الحاجات المتعلقة بالسياحة من اكتر الحاجات المهمة علشان السياحة هي قاطرة الاقتصاد الاساسية. الخليجيين بيشتغلوا في الاراضي والعقارات. يشتروا بلوكات اراضي يقطعوها ويبيعوها لبعضهم.
بخصوص الاراضى لزم يكون معاك حد فاهم لان النصب فى الموضوع ده شائع انا شخصيا سمعت عن قطعة ارض اتباعت 57 مرة … في ناس اتنصب عليها في مشاريع الاراضي دي علشان اشتروا اراضي ممنوع البناء عليها او حتى الزراعة . هم علشان يجهلوا اللغة الجورجية لبسوا في الحيطة.
الدراسة في جورجيا
يوجد جامعات كتيرة في جورجيا فيها كليات كتيرة بتدرس باللغة الانجليزية. ده متوسط المصاريف السنوية لكليات مختلفة بالدولار
كلية الطب في حدود ال7 آلاف دولار،
طب اسنان 4500 – 5500 الاف دولار،
هندسة وبيزنس 4000 الاف دولار.
اجرائات الدراسة في الخارج : ترجمة شهادة ثانوية عامة ، ترجمة، توثيق في الخارجية وبعدين سفارة جورجيا. بتراسل الجامعات اونلاين وتجيب موافقة من الجامعة الي اخترتها. تروح السفارة بجواب القبول aceeptance letter وتاخد تاشيرة دراسة. مصاريف المعيشة ذكرتها قبل كدة.
اى استفسار فى الموضوع ده تقدرو تراسلونى مباشر على ايميلى georgia1572007@gmail.com
#سامى_وليم
مدير شركة جورجيا تورز
00995557012342